Lugo e Calasancio fanse fortes na casa

Tanto CD Lugo como CP Calasancio acadaron na pasada xornada resultados positivos para os seus intereses nas dúas principais categorías do fútbol xuvenil. Os albivermellos impuxéronse ó Rácing de Ferrol por 2-0 e o Calasancio empatou a 3 tantos co Val Miñor.

O CD Lugo sumou 3 novos puntos na División de Honra xuvenil a costa do Rácing de Ferrol, ó que se impuxo por 2-0. Os de Miguel García, aínda que non ofreceron un dos encontros ós que teñen acostumada á afección lucense, tiraron de paciencia e seriedade ante un Rácing de Ferrol que pecha a táboa clasificatoria con 9 puntos, a 8 da salvación. O CD Lugo acadou a terceira victoria nos últimos catro encontros e sitúase no oitavo posto, con 34 puntos, a 8 da terceira praza.

Os albivermellos xogarán o sábado a partir das 16.00 horas no campo de Covadonga ante o TSK Roces. Os asturianos, a 5 puntos dos lucenses, suman 6 xornadas sen vencer no seu feudo, onde só acadaron 12 puntos dos 29 cos que contan na táboa. A semana pasada venceron ó Conxo por 2-4. Na primeira volta, os lucenses impuxéronse por 1-0 ó conxunto astur. Perderanse o encontro por sanción Nico e Jhonny.

Pola súa banda, o CP Calasancio empatou a 3 tantos ante o Val Miñor vigués. Os de Marcos Vázquez tiveron que remontar na segunda metade un 1-3 para poder sacar un punto, co que continúan décimos, con 27, os mesmos que o seu pasado rival. Os vermellos encadean 3 xornadas sen perder, nas que acadaron 7 puntos.

O Calasancio visita o sábado a partir das 18.00 horas o campo da Xunqueira, para medirse ó Areosa. Os vigueses, que gañaran nos Escolapios na primeira volta por 2-4, son sextos clasificados, con 5 puntos máis que os monfortinos. Na última xornada empataron a 1 tanto co Victoria e no seu feudo, aínda que gañaron o último encontro ante o Deportivo B (por 2-1), viñan de encadear unha xeira de 3 derrotas e un empate. Para o encontro do vindeiro sábado, Marcos Vázquez non ten baixas. Nos locais perderase o encontro Juan Feijoo por acumulación de amonestacións.